“Айвенхоу Майнз” 500 сая долларын алдагдал хүлээжээ
Тайлангийн дүнгээр “Айвенхоу Майнз” компани гуравдугаар сарын 31-ний байдлаар 492.5 сая долларын алдагдалтай ажиллажээ. Энэхүү алдагдлын 90 орчим хувь нь тус компанийн оны эхээр гаргасан нэмэлт хувьцааны нэрлэсэн үнийн өөрчлөлттэй холбоотойг онцолсон байна. Тус компани нэгдүгээр сард Оюутолгой төслийн санхүүжилтийн хүрээнд зөвхөн хувьцаа эзэмшигчдэд хөнгөлөлттэй үнээр зарах нөхцөл бүхий 1.2 тэрбум ам.долларын нэмэлт хувьцааны арилжаа /rights offering/ явуулсан юм. Энэхүү хувьцааны арилжаанаас тус компани 1.18 тэрбум ам.доллар босгосноо хоёрдугаар сарын 3-нд зарласан билээ.
Гуравдугаар сарын 31-ний байдлаар Оюутолгой төслийн барилга угсралтын ажил 15,1 хувьтай байсан нь 14.8 хувийн биелүүлэлтийн төлөвлөгөөнөөс ялимгүй давсан үзүүлэлт болохыг тайланд тэмдэглэжээ. Нэгдүгээр улиралд төсөлд нийт 1.8 тэрбум ам.долларын хөрөнгө оруулалт хийсэн бөгөөд баяжуулах үйлдвэрийг 2013 оны эхний хагаст ашиглалтад оруулах тухай дурджээ. Тус компани зэсийн баяжмалаа голчлон Хятадын хайлуулах үйлдвэрүүдэд нийлүүлэхээр төлөвлөж буй юм.
Харин “Айвенхоу”-гийн 57 хувийн эзэмшлийн салбар компани “SouthGobi Resources” /SGQ/ нэгдүгээр улиралд нүүрсний худалдаанаас 20.2 сая долларын орлоготой ажилласан байна. Гэхдээ “SGQ” 2010 оны дөрөвдүгээр улиралд нүүрсний худалдаанаас 41.6 сая ам.долларын орлого олсонтой харьцуулахад энэ нь нэлээд буурсан үзүүлэлт аж. “SGQ” нь Өмнөговийн Овооттолгой уурхайд коксжих болон эрчим хүчний нүүрс олборлон, Хятад руу экспортолдог компани.
Одоо “Оюутолгой” төслийн үйлдвэр, уурхайн барилга угсралтын ажил ид өрнөж буйн зэрэгцээ дэд бүтцийн ажил ч давхар эхэлжээ. Саяхан тус компаниас зарласан Оюутолгой ордыг Гашуунсухайт боомттой холбох 96,8 км хатуу хучилттай зам барих тендерт “Монроуд”, “Алтайн зам” зэрэг компани шалгарч, хариуцан гүйцэтгэхээр болсон билээ. Үүнээс гадна эрчим хүчний шугам татах ажил ч эхлэх гэж байна. 2009 оны зургадугаар сард Монголын Засгийн газар, “Айвенхоу Майнз”, “Рио Тинто” гурван талын үзэглэсэн гэрээний дагуу төслийн үйл ажиллагаа эхэлсэн эхний дөрвөн жилд эрчим хүчээ гадны эх үүсвэрээс авч болохоор тусгасан.
Энэ дагуу тус компани Хятадын хил рүү 95 км үргэлжлэх 220 КВт-ын шугам татах зөвшөөрлийг Монголын эрчим хүчний зохицуулах газраас авчээ. Шугамыг жилийн эцэс гэхэд татаж дуусахаар тооцоолсон байна. Харин дөрвөн жилийн дараагаас Оюутолгой төслийн эрчим хүчийг зөвхөн дотоодын эх үүсвэрээс хангах бөгөөд энэ хүрээнд цахилгаан станц байгуулах техник, эдийн засгийн үндэслэлийг боловсруулж буйгаа мэдэгджээ. ДЦС-ын барилгын ажил энэ оны сүүлээр эхлэх төлөвтэй буйг ч дурдсан байна.
Өнөөдрийн байдлаар “Айвенхоу Майнз”-ын хувьцаа 23.13 долларын ханштай байна. Энэ нь сар гаруйн өмнө хувьцааны ханш 27.45 доллар байсантай харьцуулахад нэлээд буурсан үзүүлэлт юм.
Б.Төгсөө
No comments:
Post a Comment